FNZ 39 - Molytini (Insecta: Coleoptera: Curculionidae: Molytinae) - Māori summary
Craw, RC 1999. Molytini (Insecta: Coleoptera: Curculionidae: Molytinae). Fauna of New Zealand 39, 68 pages.
(
ISSN 0111-5383 (print),
;
no.
39.
ISBN 0-478-09325-X (print),
).
Published 4 Feb 1999
ZooBank: http://zoobank.org/References/E763DD5D-4D90-4C9E-A68F-CB428B66C4AA
Ngā 'wīwhara' Molytine
Ko ēnei wīwhara rere-kore ētahi o ngā pītara rahi rawa atu o Aotearoa. Huri i te ao, ko rātou anō ētahi o ngā mea tino rahi o tō rātou iwi e kīia nei ko Molytini. Ina tirohia ngā wīwhara noho taramea (o te puninga Lyperobius), ko ngā tae o ngā mea pakeke, he kōkōwai, he pango, kei waenga rānei i aua tae e rua. Otirā, arā anō ētahi he ātaahua te tāekaeka haere o te mā me te parauri i ō rātou tuarā. Ko ngā pakeke o te wīwhara noho tahi ki te karo, me te wīwhara pūrekereke (nō te puninga Hadramphus), he parauri te tae, otirā, kei te tuarā me ngā kaokao ētahi tona he porohita, he tapatoru rānei te āhua.
I roto i tēnei rangahautanga, kua whakaahuatia ā-kupu ngā momo wīwhara Molytine tekau mā rua e mōhiotia ana, tae atu ki ētahi momo hou e waru. Katoa ēnei momo hou, he wīwhara noho taramea. Kua hoatu anō ngā kōrero me ngā whakamārama e mōhiotia ai, e tautuhia ai tēnā me tēnā momo. Arā anō ētahi whakaahua o ēnei wīwhara, me ētahi whakaahua o ngā āhuatanga matua o ō rātou tinana, a waho, a roto anō hoki. Ko te ingoa kārangaranga tonu o ēnei mea e tohu ana ko te taramea te tino kai a te nuinga o ngā mea pakeke o tēnei momo wīwhara; kainga ai ko ngā rau taratara me ngā pua o te taramea. Heoi anō, ka kitea anō ētahi e noho tahi ana ki te momo tipu e kīia nei ko te kopoti. Ko ngā torongū o te nuinga o ngā wīwhara taramea, ka kai i ngā akaaka me ngā rau hou o ēnei huānga o te whānau kāroti (ko te Apiaceae te ingoa pūtaiao). Engari anō ngā torongū o te wīwhara noho tahi ki te karo - ko tā rātou mahi, he wiri haere, he kaikai haere i ngā kahiwi o ngā karo o Tawhiti Rahi.
Kitea ai ēnei wīwhara Molytine i ētahi kāinga taratahi mai i ngā wai pārūrū o te Tai Tokerau kei reira nei ngā moutere o Tawhiti Rahi, ki Te Wharekauri e noho tārake mai ana i te Rāwhiti, puta atu ki ngā wāhi makariri pērā i Ngā Moutere o Snares i te tonga. Kāore he wāhi i tua atu i ngā maunga o Te Waipounamu mō te huhua o ngā wīwhara, tae atu ki te huhua o ngā momo wīwhara. ā, ko te wāhi kei reira te tino huhuatanga o ēnei momo pītara, ko te takiwā mai i ōtākou i te Uru ki Te Taka o te Kārahu a Tamatea.
Kua whai te kaituhi kia whakatakotoria mai te whakapapa o ngā wīwhara nei, ā, ka whakamahia te whakapapa nei hei tūāpapa e whakatauhia ai te huhua haere o ēnei mea i roto i ngā tau. Ka tirohia te āhua o tā rātou noho tahi ki te taiao, ki ētahi atu o ngā aitanga a Tāne, me te hōrapa haere o ngā wīwhara i te mata o te whenua i roto i ngā tau mano tini. E whakapaetia ana nō tuauri whāioio ngā wīwhara nei - arā, kua neke atu i te 65 miriona tau e noho ana i Aotearoa. E whakapaetia ana anō hoki i nohoia e ō rātou tīpuna ngā wāhi maha tonu - ko te tahamoana tēnā, ko ngā moutere me ērā atu wāhi tārake tēnā, ko ngā whenua tāpotupotu tēnā, tae atu ki ngā pae maunga.
I roto i ngā mahi rauhī i ngā aitanga a Tāne i Aotearoa, e whakaaetia ana e te nuinga he pāhekeheke te āhua o te noho mai o ēnei momo pītara ki te ao. E noho mōrearea ana hoki i te ngau mai o ngā āhuatanga kino ki a rātou, pēnei i te kiore, tō rātou tino hoariri, me ngā mahi whakarerekē i te āhua o ō rātou kāinga noho. Arā tētahi momo e whakaarotia ana i monemone noa i muri i te taenga mai o te Pākehā. Tērā ētahi tohunga tirotiro i ngā aitanga a pepeke kua āta rangahau i te wīwhara pūrekereke, ā, e ai ki tā rātou, ka noho tēnei momo wīwhara hei waitohu mehemea e nohoia ana tētahi moutere e te kiore, kāore rānei. (Arā nē, mehemea kei te nui ngā wīwhara pūrekereke, karekau pea he kiore, ā, mehemea korekore ana he wīwhara, kei reira pea te mahi a te kiore.)
Ko te kaituhi nei, a Tākuta Robin Craw, te Kaitiaki o te Wāhanga Mātai i ngā Aitanga a Pepeke i te Whare Pupuri Taonga o ōtākou, i ōtepoti. Ko ētahi o āna rangahautanga o ngā tau ki muri, ko te tirotiro anō me te whakahou i ngā whakarōpūtanga o ngā pūrerehua pātītī taranui me ngā pūrerehua 'geometrid'. Kua whakaputa tuhinga hoki e pā ana ki te hītori, ngā tikanga me ngā mātāpono o te 'koiora-matawhenua' me ngā pūnaha whakarōpū e pā ana ki te kunenga mai o ētahi mea. Ko tāna mahi i ēnei rā, he kohi, he whakaahua i ētahi momo pūrerehua hou. Ko ēnei momo hou, nō roto i ngā whānau pūrerehua noho toka, ngā pūrerehua kura, me ngā pūrerehua noho maunga he pāngo te tae. Arā anō tētahi kaupapa e whāia ana e ia, ko te tirotiro i te ongeonge haere o te katipō.
He Kupu āwhina - Glossary
aitanga a Pepeke — generic term for insects
koiora-matawhenua — biogeography
kōkōwai — red-brown
kunenga — evolution
monemone noa — obliterated, rendered extinct
mōrearea — exposed to danger
ongeonge — becoming rare, endangered
pāhekeheke — uncertain, unstable
pātītī taranui — tussock grass
pūrekereke — knobbled
tāekaeka — striped
tārake — isolated, remote
Tawhiti Rahi — Poor Knights Islands
Te Taka o te Kārahu a Tamatea — Fiordland
tona — tubercle
tuauri whāioio — very ancient times
whenua tāpotupotu — lowland
wīwhara — weevil
Translation by: H. Jacob, Huatau Consultants, Wellington