Te tiaki i te NZAC
Ko te pai o ngā mahi rangahau i ngā huinga pepeke o roto i te kohinga, kei te āhua tonu o te pai o ngā tauira pepeke.
- Kāore e tino pai ētahi tauira kua hē nei te āhua, i kohia i ētahi wāhi ruarua nei. He pai noa ake ngā tauira maha o tētahi momo e whakaata ana i te āhua tūturu o tana noho ki te taiao.
- Kāore e memeha haere te whaihua o tētahi tauira ina tawhito haere te tauira; ka kaha ake tana noho taonga mai, i te mea:
- - ka taea te hokihoki ki te tirotiro anō i ngā tauira ko rātou te tūāpapa o ētahi rangahautanga;
- i ētahi wā ko rātou ngā mōrehu o ngā momo kua kore e noho atu ki tētahi rīpoinga i te mea kua kaha rawa te rawekehia o taua rīpoinga;
I ētahi wā he mahi nui tonu te āta tiaki i ngā tauira tawhito.
Te whakarite i ngā tauira o ngā angawaho
He mahi uaua tonu te whakarite i ia pepeke, i te mea me whai kia āta kitea ōna āhuatanga matua.
Hei tauira, pinea ai ngā pūrēhua kia roha ngā parirau. E taea ai tēnei, me pēnei te āhua o te pepeke:
- kia tangatanga (kia ngohe)
- ka āta pinea ki tētahi papa ki reira totoka ai
- ka hoatu he tapanga ki a ia
- ka whakawhitihia ki tētahi pouaka rokiroki.
Ko ngā pepeke moroiti:
- tērā ka pinea tukuruatia, arā, ka pinea ki ngā pine moroiti ki ngā ngaku hukahuka plastazote i te tuatahi;
- ka whakapiria rānei (ki te kāpia) ki te akitu o tētahi kāri;
- ka whakatakotoria rānei ki ngā mata-kōata kia pai ai te āta mātaki ki te karu whakarahi; he mahi roa tēnei, ka whāia he raupapa rokiroki ā-matū, ā, me āta whāwhā anō i te pepeke. E 8-10 noa iho pea ngā mata-kōata pūmau ka oti i te tangata kotahi i te rā kotahi.
Tērā ka hē haere te hanga o ngā pepeke e puritia ana ki ngā kohinga, nō reira me āta whai kia whakaitihia ngā āhuatanga tērā ka whakararu i tō rātou noho taonga tonu ki te ao pūtaiao.
- Ko ngā tauira ngohe me ērā ka raua ki te putunga nui:
- ka rokihia ki te waihā ewaro 70% te kaha, kia kore ai e popo;
- ka puritia ki tētahi taiwhanga mātao pōuriuri, kia kore ai e pā he huringa matū-tipu ki a rātou.
- Mō ngā tauira kua pinea, ka āta whakatakina tō rātou 'taiao':
- kia kore ai e kaha piki, e kaha heke rānei te takawai me te pāmahana (i te mea ki te pērā, ka tipu ko ngā pūheka harore);
- kia iti ai te parawhiti (mā reira e pā ai ētahi huringa matu-aho, hei tauira, ko te māwhe o ngā tae).
Te whakarōpū i ngā tauira
Ko te wāhanga tuarua o ngā mahi tiaki, ko te whakarōpū tonu i ngā tauira. Ka kīia tēnei ko te "tātai whakapapa i roto tonu i te paepae".
Ko tā ngā tohunga:
- he āta tirotiro i ngā tauira
- he whakaingoa i tēnā, i tēnā (me te whakamahi tapanga hou)
- he whakarōpū pūnahanaha i ngā tauira - i te nuinga o te wā, ka wehewehengia i runga i te momo, mehemea he toa, he uwha rānei, ā, i runga anō i te wāhi i reira te tauira e noho ana.
