FNZ 42 - Aphodiinae (Insecta: Coleoptera: Scarabaeidae) - Māori summary
Stebnicka, ZT 2001. Aphodiinae (Insecta: Coleoptera: Scarabaeidae). Fauna of New Zealand 42, 64 pages.
(
ISSN 0111-5383 (print),
;
no.
42.
ISBN 0-478-09341-1 (print),
).
Published 15 Jun 2001
ZooBank: http://zoobank.org/References/F4B66E0D-5801-45E0-89AE-E9B515337022
He Whakarāpopototanga
Ngā pītara tūtae
Kitea ai ngā mea o te whānau iti Aphodiinae i ngā koko katoa o te ao, heoi ko te whakapae, ko ngā wāhi mahana o te 'Ao Tawhito' tō rātou tino kāinga. O ngā iwi me ngā puninga ka kitea i reira, he ruarua noa iho ka kitea anō i te 'Ao Hou' me Ahitereiria. Heoi, ko te nuinga o ngā puninga me ngā iwi ka kitea i ēnei takiwā, kāore e kitea i wāhi kē.
Kei te āhua 3100 ngā momo aphodiine e mōhiotia ana, otirā, arā noa atu pea ngā momo kāore anō i āta tautuhia. E tino hāngai ana tēnei whakapae ki ngā takiwā o te Pū o Amerika me Amerika ki te Tonga, tae atu ki āhia. He rerekē te hanga o tēnā, o tēnā, ā, ko te rahi, kei waenga i te 0.8 mm me te 16.0 mm. Ko te 'pītara tūtae' tō rātou ingoa kārangaranga, engari ko tētahi wāhanga noa iho o tēnei whānau iti ka kitea e noho ana i te tūtae. He kai tūtae, he kai popo ngā aphodiinae, ā, ka kitea e kai ana, e whakaputa uri ana i roto i ēnei mea i te oneone. Kua rangahaua ngā momo maha tonu e noho ana i ūropi, i āhia, i Amerika, me Ahitereiria, me ētahi momo e rua o Aotearoa (ko te Acrossidius tasmaniae (Hope) me te Ataenius picinus Harold), he kaikai māra nō rātou. Arā anō ētahi momo pērā i a Phycocus graniceps Broun me te Tesarius sulcipennis (Lea) e kitea nuitia ana ki ngā tāhuna o te tahamoana. He maha ngā momo i tāwāhi e noho ana i waenga i a ngāi pōpokorua me ngāi pōpokotea, ko ētahi anō e noho ana ki ngā rua o ētahi kararehe whāngote moroiti. Ko ētahi momo ruarua nei, ka whānako i ngā kōhanga o ngā pītara tūtae hanga kōhanga (arā ngā Scarabaeidae: Scarabaeinae), hei wāhi whakaputa uri mō rātou. Whaiwhai ai ngā aphodiinae pakeke i te mārama. Ka kitea nuitia hoki i ngā momo tūtae maha, i ngā popo, i raro i ngā poro rākau me ngā pūkohu, i ngā rākau pirau, i raro rānei i te hiako o ngā rākau kua mate noa. E mōhiotia ana te hanga kōhungahunga o ētahi momo āhua ruarua nei.
E rua tekau ngā momo Aphodiinae o Aotearoa e mōhiotia ana ināianei. Tekau mā tahi o ēnei, kua rere mai i tāwāhi, nā ngā mahi tauhokohoko pea i heri mai. E ono i tau mai i Ahitereiria, e rua mai i Amerika, kotahi mai i āwherika, e rua atu anō nō ūropi taketake ake, engari kua puta atu ki ngā hau e whā.
Tērā anō ngā momo e iwa o te puninga Phycocus Broun (kua tae atu anō ki Tahimānia) me Saprosites Redtenbacher, he momo tūturu nō Aotearoa. Kotahi te momo ka kitea i Te Waipounamu anake, e rima ka kitea i Te Ika a Māui anake, kotahi ka kitea i Te Ika a Māui me ngā moutere Kermadec, kotahi anō i Te Ika a Māui me Rēkohu. Kotahi te momo nō Manawa-tāwhi tūturu, kotahi nō Rēkohu tūturu, kotahi nō ngā Kermadec tūturu (kua tau mai anō ki Te Ika a Māui). Ko ngā momo ehara nō konei taketake ake, engari kei konei e noho ana, ka kitea nuitia i ngā taone, i ngā māra huarākau, i ngā pātītī, me ērā atu taiao nā te ringa tangata i raweke. Ko ngā hono i waenga i ngā Aphodiinae o Aotearoa taketake ake, e āhua rite ana ki ērā o Ahitereiria.
Translation by: Hēni Jacob, Huatau Consultants, Levin