FNZ 44 - Lycosidae (Arachnida: Araneae) - Māori summary
Vink, CJ 2002. Lycosidae (Arachnida: Araneae). Fauna of New Zealand 44, 94 pages.
(
ISSN 0111-5383 (print),
;
no.
44.
ISBN 0-478-09347-0 (print),
).
Published 23 Dec 2002
ZooBank: http://zoobank.org/References/3410DFC9-CB06-42DB-8B88-AD93A35AE4D2
He whakarāpopototanga
Ngā pūngāwerewere wuruhi
He nui ake i te 2200 ngā momo o te whānau Lycosidae e mōhiotia ana puta noa i te ao, ā, kei ngā ripoinga mārakerake te nuinga. Ko tētahi tino tohu o te pūngāwerewere wuruhi, ko te mau mai o te kahu hua porotaka ki muri o te uwha pakeke, ko ia anō tērā ki te waha i ana punua ina whānau mai. He kiri hunahuna te nuinga o ngā mea nei, engari tērā tonu ka kitea i a rātou e kimi kai ana i te awatea. Kāore ngā pūngāwerewere nei e hanga māwhaiwhai hei hopu kai, hāunga anō ētahi momo pūtake i tāwāhi. Arā ētahi taiao e noho ai ko ngā pūngāwerewere wuruhi tētahi ōrau nui o ngā konihi tuarā-kore katoa o taua taiao. Me kōrero tēnei āhua i ngā takiwā mārakerake. Heoi anō, he konihi pai te wuruhi nei, ki tā te tangata titiro.
E 27 ngā momo pūngāwerewere wuruhi e kitea ana i Aotearoa. E rua i tau māori mai i whenua kē - ko tētahi e noho ana ki ngā tōpito katoa o Ahitereiria, ko tētahi, kei te whānuitanga atu o Te Moana-nui-a-Kiwa. Nō Aotearoa taketake ake ērā atu momo e 25. Ko ētahi o ēnei, nō te puninga Allotrochosina me te puninga Artoria, ā, he whanaunga ō rātou i Ahitereiria. E whakapaetia ana nō konei anō, taketake ake, te puninga Anoteropsis tae atu ki te Notocosa, ā, ko ngā uri tata o ērā, kei Ahitereiria anō.
Pērā anō i te nuinga o ngā momo lycosid, noho ai tēnā me tēnā momo pūngāwerewere wuruhi o Aotearoa ki tōna ake ripoinga whāiti. Anei ētahi o aua ripoinga: ngā tahataha kirikiri o ngā maunga, te whaiawa, te tahamoana, ngā raorao pātītī taranui, te ngahere, ngā rēpo, me ngā whenua tāpotupotu. Ko te momo ka tino kitea, ko te Anoteropsis hilaris. Arā tana kāinga kei ngā whenua pātītī huri i te motu, tae atu ki ngā ripoinga kua rawekehia e te ringa tangata (hei tauira, ngā māra me ngā pātītī ahuwhenua). E whakaarotia ana he konihi pai tēnei, i te mea ka pau i a ia ētahi pepeke kino te kai. Kua rangahautia ana anō hoki tana noho hei waitohu o ngā wāhi kua kinongia e te tāoke patungārara.
Translation by: Hēni Jacob, Huatau Consultants, Levin