FNZ 49 - Lithinini (Insecta: Lepidoptera: Geometridae: Ennominae) - Māori summary
Weintraub, JD; Scoble, MJ 2004. Lithinini (Insecta: Lepidoptera: Geometridae: Ennominae). Fauna of New Zealand 49, 48 pages.
(
ISSN 0111-5383 (print),
;
no.
49.
ISBN 0-478-09357-8 (print),
).
Published 29 Apr 2004
ZooBank: http://zoobank.org/References/C171A227-BFE7-4AB7-AB6A-C84DF57A6013
He Whakarāpopototanga
Ngā pūrēhua whakakoromeke Lithinini
Ko ngāi Lithinini tētahi o ngā iwi pūrēhua whakakoromeke ennomine kua tino marara te noho ki te ao, inā rā, e kitea ana i ngā whenua rahi katoa, hāunga anō te Kōpakatanga ki te Tonga. He pūrēhua ririki, he whāiti anō te tinana. Ko ia tētahi o ngā rōpū pepeke kaiota ruarua ko ngā huruhuru whenua tā rātou tino kai.
I Aotearoa nei me ōna tini moutere, e 3 ngā puninga, e 8 ngā momo, ā, ko Aotearoa anake te wāhi o te ao e kitea ai ngā pūrēhua nei. Ko te ngahere te tino kāinga o te nuinga, engari arā ētahi momo ka piri tahi ki te rarauhe, ā, kei te noho ētahi o ēnei ki ngā wāhi kua rawekehia i ngā taitapa o te ngahere, i ngā mōheuheu anō. Toro ai ngā pūrēhua pakeke i ngā pua o ētahi tipu (i ngā Myrtaceae māori, tae atu ki te 'rātā tea' [ Metrosideros perforata (J.R & G. Forst.) A. Rich], me te Loganiaceae [ Buddleja davidii Franchet]) ki te kai ngongo māna. Ka tukuna e te uwha ana hua ki runga, ki te taha tonu rānei o ngā huruhuru whenua ka kainga e ngā torongū. Kai takitahi ai ngā torongū i ngā wāhi māota o te huruhuru whenua, kātahi ka ngōki atu ki ngā rau popo kei raro tata iho i te oneone, ki ngā tētē mate rānei o te huruhuru whenua, ki reira whakangeti ai.
He huhua tonu ngā momo huruhuru whenua ka noho hei kāinga mō ngā pūrēhua nei, mai i ngā mea ka piri tonu ki te papa o te ngahere, pērā i te Paesia (Dennstaediaceae), tae atu ki ngā huruhuru whenua rau nui, pērā i te Phymatosorus (Polypodiaceae), me ngā rākau tonu, pērā i te Cyathea , i te Aslophila (Cyatheaceae) me te Dicksonia (Dicksoniaceae).
Ko tā ngāi Lithinini hei ārai atu i te hoariri, he taka, he peke atu rānei i te huruhuru whenua, ā, ki te mōrearea tonu tana noho, kua takawhitiwhiti, kua takaoraora. Kumea ai ngā pakeke e te rama, ā, pērā i te maha atu o ngā Geometridae noho ngahere, ko ētahi atu tikanga pai hei kohikohi i ngā hanga nei, ko te papaki otaota, ko te 'hao' rānei ki te toiemi i runga ake i ngā otaota i ō rātou rīpoinga. Hei te torengitanga o te rā ka tīmata te rere haere, pēnei tonu ā, heke ai te pāmahana o te hau takiwā ki tērā e kore ai e taea e ngā mea pakeke te rere tonu. Ko te nuinga o ngā Lithinini o Aotearoa, he whakaputa i ngā reanga e rua i ia tau, ā, he ngeti te āhua ka takurua ana.
Katoa ngā pūrēhua lithinine o Aotearoa kāore e kitea i tāwāhi, ka mutu, he matahuhua tonu ina whakaarohia he whenua iti noa tēnei (i te whānuitanga atu o te rohe Palaearctc kei tēnei ahopae e noho nei tātou, e 2 noa ngā momo, o ngā puninga e 2). Kua pai noa te urutau atu a ngā pūrēhua nei ki ngā ngahere ua kāore e tino makariri, e kaha nohoia ana e ngā momo huruhuru whenua huhua noa. Koirā kāore i kō mai, i kō atu i ngā ngahere o Aotearoa hei kāinga mō ngā pūrēhua lithinine.
Translated by: Hēni Jacob, Levin