FNZ 52 - Raphignathoidea (Acari: Prostigmata) - Popular summary Māori
Fan, Q-H; Zhang, Z-Q 2005. Raphignathoidea (Acari: Prostigmata). Fauna of New Zealand 52, 400 pages.
(
ISSN 0111-5383 (print),
;
no.
52.
ISBN 0-478-09371-3 (print),
).
Published 20 May 2005
ZooBank: http://zoobank.org/References/5F7C5C50-9D70-459B-BE40-F7CB5D5E5DFE
Māori summary — He Whakarāpopototanga
Raphignathoid mites
Whakamahia ai ngā pūwereriki o te whānau nui Raphignathoidea hei patu ā-koiora i ngā pūwereriki pūngāwerewere, ngā pūwereriki eriophyid, me ngā ngārara unahi i roto i ngā kawenga ahuwhenua, whakatipu rākau. Ko te nuinga o ngā momo, he konihi hāereere noa. Heoi anō, ko ētahi he kai pūkohu, ko ētahi anō he hanga ka piritahi, ka pirinoa rānei ki tētahi momo pepeke.
E ora ana ngā tūpuna taketake o te whānau nui nei i te 56 miriona tau ki muri. Ko Acariformes te pūtoi o runga, ko Prostigmata te pūtoi, e 770 pea ngā momo, e 57 pea ngā puninga i roto i ngā whānau tekau mā tahi. Kua marara ki ngā tōpito katoa o te ao, ā, kei te huhua tonu ki te nuinga o ngā momo takiwā o te ao. Arā hoki ētahi kei te Kōpakatanga ki te Tonga.
E rima, e ono rānei ō rātou tūātipu mai i te whānautanga ā, mate noa. Kotahi ki te toru wiki e whanake ana mai i te hua ki te hanga pakeke. He paku tere ake te pakari haere o ngā toa i ngā uwha. Mō te wāhi ki ngā uri ka puta ake, ki te whakatōkia te hua, he uwha te putanga, ki te kore e whakatōkia, he toa te putanga. Heoi, i roto i ngā uri o ngā uwha ka aitia, he maha ake ngā uwha.
O ngā hanga konihi, kei tēnā momo tāna tino kai, kei tēnā anō tāna. I tua atu i te kai pūwereriki me ērā atu pepeke iti, ko te hae anō tētahi o ā rātou kai, ā, tērā ka tipu haere, ka whakaputa uri i runga i ngā momo hae huhua.
I tīmataria e Wood ngā rangahau whakarōpū i tēnei whānau nui i Aotearoa i ngā tau waenga o ngā 1960. I muri mai, ka puta i a ia tētahi raupapa rangahau mō ngāi Stigmaeidae (1966, 1967, 1968, 1970, 1971b, 1971c, 1981). Nā Luxton (1973) i whakaahua ā-kupu ētahi momo hou e toru o ngāi Cryptognathidae, nā Bolland (1991) i whakaahua tētahi momo Camerobiidae. I nā tata nei, ka whakaputaina e Fan rāua ko Zhang ētahi atu tuhinga e rua mō ngāi Stigmaeidae (2002a, 2002b).
I tēnei o ngā putanga, ka āta whiriwhiria anō te whānau nui Raphignathoidea (Acari: Prostigmata). Ka takoto hoki he ara tautohu mō ngā whānau me ngā puninga o te ao. Ka tirohia anō te whakarōpūtanga, te koiora, me te taupuhi kaiao o ngāi Raphignathoidea puta noa i te ao, kia noho ai ngā momo e 76 o Aotearoa, tae atu ki ngā momo hou e 21 kua kitea, ki tōna horopaki e tika ana. Nō ētahi puninga e 20 (ko tētahi he puninga hou) me ētahi whānau e rima ngā momo nei. Katoa ngā momo kua āta tohua ō rātou āhuatanga matua e rerekē ai tētahi i tētahi, kua tuhia he ara tautohu, kua whakaahuatia ā-kupu, ā-pikitia, kua tuhia anō he kōrero mō ngā tohutoro whakarōpū, ngā kāinga noho, me te tītaringa o tēnā momo, o tēnā.
Translated by: Hēni Jacob, Tāmaki-makau-rau / Auckland